(Madda Oduu ABO/MOA/Hagayya 8, 2009) Oduun bubbulee nu dhaqqabe akka hubachiisetti barattootni Oromoo Yunversitii Finfinnee Kiiloo 6 walitti dhufuun dhimma QBO irratti marii taasisaniiru. Waytuma kanattis guyyaa murtiin diinummaa Finfinnee irratti darbe Adoolessa 13 yaadatanii akka oolan oduun kun dabalee hubachiisa.
Barattootni Oromoo kunniin ejjennaa fudhataniin hanga kaayyoon QBO galma ga’utti wareegama barbaachisu kafalaa, falmaa godhan kan itti fufan ta’uu addeessan. Gootowwan Oromoo qabsoo Oromoo irratti kufaniifis yaadannoo gochuudhaana keeka isaan kufaniif irraa osoo hin maqiin galaam gahuu akka qaban hubachiisaniiru.
******
Waraanni wayyaanee Godina Baha Oromiyaa ummata saamaa akka jiru gabaafame
(Madda Oduu ABO/MOA/Hagayya 8, 2009) aka Maddi oduu MOA ifa godhutti waraanni faashistii wayyaanee Baha Harargee mooraa waraanaa Addeellee qubatee jiru daandii konkolaataatti ba’uun konkolaattota ummataa Gaara Mul’ataatti deddeebi’an dhaabsisanii saamaa jiran. Kana malees konkolaattota baadiyaalee naannoo sanii keessaa jimaa gara magaalaatti fe’anis dhaabsisuun namoota irra jiran buusanii dhaanaa fi maallaqa irraa saamaa akka jiran oduun kun dabalee hubachiisa.
Ummatni saamamaa jiru kun maqaa ABO deggertuu fi WBO nyaachiftu jedhuunis akka malee akka hiraarfamaa jirantu gabaafame.
Naannoo Gaara Mul’ataatti basaasotni wayyaanee Tigroota ta’an kanneen Afaan Oromoo baratan maqaa albuudota barbaadna jedhuun bobba’anii ummata basaasaa akka jiranis maddeen keenya dabaluun beeksisaniiru.
Namoota albuuda of harkaa qaban gowwoomfamanii itti gurgurachuuf itti dhaqan qabsiisanii hidhaatti darbaa fi eessaa fiddeen qormaataan gidirsaa jiraachuunis himameera. Ummatni basaasota wayyaanee kanneen irraa dammaqinaan akka of eeggatan sabboontotni Oromoo dhaamsa dabarsaniiru.
MOA
